AZTERLAN Metalurgia Ikerketa Zentroak patentepean garatu duen metodologiari esker, burdina urtuaren osagaiei higadurari eta korrosioari ezaugarri hobetuak eman dakizkieke, gainazala aldatzeko teknologien bidez. Garatutako berrikuntzak laser cladding bidez estaldura metaliko baten ekarpena eta osagaiaren gainazala aldez aurretik prestatzeko prozesua konbinatzen ditu, galdaketa-prozesuaren ezaugarrien gainean jardunez, zehazki, moldearen barrunbean hauts metalikoak aplikatzean oinarritutako tratamendu berritzaile baten bidez.
Laser teknologien bidezko estaldurak aplikatzea oso teknika erabilia da material eta fabrikazio-prozesu konbentzionalagoetan fabrikatutako osagai metalikoen ezaugarriak hobetzeko, gainazalaren ezaugarrien gainean jardunez etekina ekarri nahi denean. Burdin urtuzko osagaien kasuan, prozesu konplexu eta zaila da estaldurak teknologia horien bidez aplikatzea, eta horrek arrisku batzuk ekar ditzake, piezen osotasuna eta lanean jarduteko gaitasuna kolokan jar dezaketenak: kalte termikoko eta estres heterogeneoko eremuak sortzea, porositatea edo piezen propietate mekanikoei zuzenean eragiten dieten fase gogortu eta hauskorrak, etab.
Muga horietako batzuk substratua aurrez berotuz edo laser deposizioagatiko ekarpen-geruzak biderkatuz gaindi daitezkeen arren, kostu energetiko eta ekonomiko handiko prozesuak dira, ekoizpen-eraginkortasun txikikoak. Zailtasun horiek areagotu egiten dira geometria konplexuko osagaiak direnean.
Arazo horiek gainditzeko asmoz, AZTERLANek garatutako metodologiak galdaketa-prozesutik bertatik moldatutako piezen gainazala prestatzea lortzen du, ondoren L-DED bidez zuzenean lagatzeko estaldurak, berme guztiekin. Horretarako, pintura erreaktibo bat garatu da, piezak sartuko diren hareazko moldearen barrunbean zuzenean aplikatuta, osagaien propietateak isurketatik egokitzeko aukera ematen duena.
Enara Mardaras doktoreak, AZTERLANeko materialen korrosioaren eta babesaren arduradunak, azaltzen duen bezala, moldearen barrunbean aplikatzen dugun pintura erreaktiboa, dela zulo osoan, dela piezaren puntu espezifikoetan, erreakzio hori piezaren gune espezifikoetan bakarrik sortu behar badugu, lehen mailako pintura gisa jokatzen du, eta pieza solidotu ondoren, piezaren gainean laser teknologiak zuzenean erabiltzeko aukera ematen digu. Pintura erreaktibo hori, batez ere, ad-hoc garatutako metalezko hautsek osatzen dute, aleazio-elementuen ehuneko desberdinez eta elementu aglomeratzaile batez osatuak. Era berean, metodologia honek L-DED teknologiaren bidez emango diren ad-hoc hauts metalikoen diseinua eta aplikazio-eszenatoki desberdinetarako deposizio-parametroak ere jasotzen ditu.
Pintura erreaktiboa garatzeko nahiz laser teknologien bidez aplikatzeko erabilitako hauts metalikoak AZTERLANren hauts metalikoen atomizazioko instalazioetan fabrikatu dira.
NiTi hauts metalikoen atomizazio-prozesua, AZTERLANen instalazioetan moldeen barrunbean aplikatutako pintura garatzeko erabiltzen dena.
