AZTERLANen parte hartzea 125 MetalCasting Congress (USA) ekitaldian

Gorka Alonso doktoreak “Effect of the Type of Inoculant on the Shrinkage Porosity of High Silicon Spheroidal Graphite Iron” ikerketa lana aurkeztu du galdaketa teknologien alorrean erreferente den nazioarteko ekitaldi tekniko entzutetsuan.

AZTERLAN Zentro Teknologikoko ikerlari Gorka Alonso doktoreak orientazio industrial nabarmena duen ikerketa lan honen emaitzak aurkeztu ditu, zeinaren helburua den inokulatzaile komertzialek silizio altuko burdinazko osagarrien porositatea gutxitzeko duten gaitasuna aztertzea eta balioztatzea.

Burdinaren solidotze mekanismoen alorrean espezialista den Alonso doktoreak adierazi duen moduan, silizio altudun grafito esferoidaleko burdinek erronka esanguratsuak aurkezten dituzte kalitatezko galda-osagarriak fabrikatzeko, hurrupadurazko akatsak izateko joera baitute. “Faserik kritikoena solidotzearen bukaera da. Momentu horretan, sortzen de grafito eutektiko kopurua jaisten den heinean, grafitoaren hedapena nahikoa ez izatea gerta liteke solidotzearen bolumen galera konpentsatzeko. Ondorioz, mikro-hurrupadurak (mikro porositatea) gertatzeko arriskua handitu egiten da”. Inokulatzaileen erabilerak mikro-porositatea gutxitzen laguntzen du. Horregatik, “ikerketa zabal bat burutu dugu inokulatzaile komertzial desberdinen efizientzia ebaluatzeko 3.45%C, 3.75%Si SG erako burdina batean”.

Aurkezpenean, Alonso doktoreak ikerketan lortutako ondorio garrantzitsuenak azaldu ditu, egindako azterketa desberdinen emaitzen bitartez, hala nola, “analisi metalografikoa noduluen tamaina, distribuzioa eta kontaketa egiteko, SEM bidezko azterketa nukleo mota aztertzeko, eta tomografia bidezko analisia laginen porositate maila kuantifikatzeko”. Horrez gain, lan honetan solidotze eutektikoan zehar gertatzen den grafitoaren formakuntza azkartasuna eta porositate maila erlazionatzeko saiakera egin da.

Ikerketa lana AZTERLAN Zentro Teknologikoaren eta Dr. Emeritus Doru M. Stefanesku doktorearen (Ohio State University eta Alabama University) ikerketa taldearen arteko elkarlan estuan egin da.

Gorka Alonso (AZTERLAN) doktorean aurkezpena 125 MetalCasting Congress (AFS American Foundry Society) ekitaldiaren online plataforman.