AZTERLAN Metalurgia Ikerketa Zentroak lankidetza-hitzarmena sinatu du RESAND Oy enpresa finlandiarrarekin, hareak birsortzeko eta birziklatzeko sistema aurreratu bat ezartzeko euskarri teknologikoa emateko. Horri esker, galdaketa-sektorearen ingurumen-inpaktua hobetu ahal izango da, eta, aldi berean, hareen kudeaketaren egungo arazoari erantzun ahal izango zaio.
Galdaketa-moldeak eta -arrak fabrikatzeko harea berria erabiltzearekin lotutako erronka gero eta handiagoa da, industriak kantitate handietan sortzen duen hondakina kudeatzeko irtenbide berriak gehitu behar direlako. Hori dela eta, teknologia berriak eta berreskuratze-, birsortze- eta birziklatze-bideak garatzeko beharra premiazkoa da.
Lucía Unamunzaga AZTERLANeko Iraunkortasun arloko arduradunak azaldu duenez, “teknologia aurreratu hau ezagutzeko aukera izan dugu, zeinaren garapenak eta zabalkundeak aurrerapen esanguratsua ekar dezaketen galdaketa-industriarako, galdaketaren ingurumen-inpaktua eta eragin operatiboa nabarmen hobetuz. RESAND Oy enpresa finlandiarrak garatua, teknologia berritzaile hau hareen tratamendu termo-mekanikoan oinarritutako birsorkuntza-sistema modular bat da, eta horren portaera modu intentsiboan aztertzen ari gara maila erdi-industrialean, laborategiko eskalako probak baliozkotu ondoren”.
Sistema honek erabilitako harea prozesatzen du bi etaparen bidez. Etapa horiek harea-partikulak material aglomeratzailetik eta beste ezpurutasun batzuetatik bereizten dituzte tratamendu termiko espezifiko baten bidez, ondoren ezpurutasun eta xehetasun horiek bereizteko eta berreskuratutako harea hozteko, galdaketaren produkzio-sisteman bertan berrerabiltzeko.
Teknologia honen bidez, galdategiek erabilitako hondarraren zati handi bat birzikla dezakete, arrak eta moldeak fabrikatzeko prozesuan bertan sartu ahal izateko. Sistema aglomeratzailearen arabera (moldekatze berdea edo moldekatze kimikoa), % 95erainoko berreskuratze-tasak lor daitezke (xehe itxurako galeren ehunekoa onartuz). Aurrerapen horri esker, nabarmen murriztu daiteke galdaketaren ingurumen-inpaktua (aurrezten dira lehengaiak eta erosketa-kostuak, garraiorako eta zabortegian uzteko kostuak, etab.).
Hareak birgaitzeko RESAND sistema modularraren irudia (iturria: https://resand.eu)
“RESANDekin dugun lankidetza-hitzarmenak sendotu egiten du AZTERLANk galdaketa-teknologietan hobekuntzak ekarriko dituzten konponbideak garatzen jarraitzeko egin duen apustua. Harea erabilien kasuan, ezin dugu ahaztu hondakin-korronte garrantzitsuenetako bat direla (EAEko hondakin ez-arriskutsuen 5. korrontea), eta gero eta kezkagarriagoa dela industriarentzat, gero eta ingurumen-eskakizun handiagoak baititu”.
Hondarren kudeaketa iraunkorrerako konponbideak bilatzen
Galdaketa-hondarren kudeaketarekin eta birziklapenarekin lotutako soluzio teknologikoen garapenean, AZTERLAN hainbat ikuspegitatik ari da lanean: berreskuratzea, birziklatzea eta berrerabiltzea prozesu berean, edo balio erantsiko beste aplikazio batzuetan.
Alor honetako AZTERLANen proiektu eta garapen berrienen artean, honako hauek nabarmentzen dira:
- Itzulerako galdaketa-harea berreskuratuak egokitzeko ur-dosifikazio sistema adimenduna (teknologia transferentzian)
- Eraikuntzako aplikazio eta materialetan hondarrak errebalorizatzeko soluzioak garatzea eta erakustea
- Berrerabilitako harea oinarri hartuta moldeak eta arrak fabrikatzeko soluzioak garatzea (HICORE proiektua)
- Aglomeratzaile ez-organikoak burdina eta altzairuaren galdaketan sartzea (LIFE Green Casting proiektua)
- Hondakin industrialen kudeaketa aurreratua (lan-alorra)
Horrez gain, hainbat baliabide daude eskura Knowledge Hub atalean:
