IK4-Azterlanek Portugaleko 18. Galdaketa Kongresu Nazionalean parte hartu du

Bilkura Portugaleko Galdaketa Elkarteak antolatu du eta 150 teknikari eta profesionaletik gora batu ditu.

“Lehiakortasunerako erronkak” izenburuarekin, Portugaleko Galdaketa Kongresu Nazionalak sektoreak aurre egin beharreko erronkak aztertzea izan du helburu. Erronka hauen atzean aurkitzen dira merkatuaren eskaera hazkundea, 4.0 industriarekin lotutako teknologiak, ibilgailu elektrikoa eta material berrien garapena.

IK4-Azterlan Ikerketa Metalurgikorako Zentroaren izenean, Susana Méndez doktoreak, metalurgia prozesuen I+G alorreko koordinatzailea, hartu du parte material eta fabrikazio prozesu berrien inguruko mahai-inguru batean. Mahai-inguruko parte-hartzaileek, nahiz eta material eta prozesu berriak sortzeko interesa azaldu duten, epe laburrean aurre egin beharreko muga esanguratsuak nabarmendu dituzte, besteak beste, Tier 1-en eta OEM-en aldetik homologazioak lortzeko zailtasuna edota industrializazioari lotutako zailtasunak.  Mendez doktorearekin batera mahai-inguruan parte hartu dute Zollern, Grohe, Renault Cacia edota  Bosch enpresetako ordezkariek.

IK4-Azterlan-ek aktibitate esanguratsua dauka Portugalen, non Portugaleko Galdaketa Elkartearekin dauzkan loturez gain Sakthi Portugal edota N. Mahalingam Centre for Innovation and Technology (CITNM) erakundeekin harreman estuak dauzka. Azken honekin, automobilgintza alorrarekin lotura duten ikerketa lerroak lantzen dihardu.

18. Galdaketa Kongresuan parte hartu duten zenbait erakunde dira ondokoak: ABP – Indution, Sonafi, APF, ASK, AtPeople, Catholic Business School, Capgemini, Ccenergia, Duritcast, FEUP, feline, Fritz Hansberg, Funfrap, Hüttenes Albertus, I. Kaizen, IQNet, Metalflow, Meltec, Bühler, Krown, Idra, Magellan, Rheinfelden-Alloys, Sakthi Portugal, SEI, Synergie eta Universidade Católica.