Euskal partzuergo batek Europako hego-mendebaldean fabrikazioa bultzatzeko berrikuntza-sare bat jarriko du martxan

Aernnovak, Mondragon Korporazioak, IK4 Research Alliancek, ITP Aerok eta Tecnaliak gidatuko dute ekimena, Euskadin kokatua, eta 2019an jarriko dute martxan

 

Fabrikazioaren sektorea Europaren motor nagusietako bat da; bi milioi enpresa baino gehiago ditu, eta ia 30 milioi pertsonak lan egiten dute zuzenean sektore horretan. Hala ere, sektorea goitik behera aldatzen ari da merkatuaren eta gizartearen behar berriek zein aurrerapen teknologiko azkarrek eta  ingurumen eta jasangarritasun alorreko baldintzek bultzatuta. Sektorea lehiakorragoa, iraunkorragoa eta produktiboagoa izan dadin, EIT Manufacturing ekimena sortu da, Europako Batzordearen laguntza duena. Ekimen honetan kontinente osoko 50 enpresa eta zentro teknologikok baino gehiagok parte hartuko dute, helburu dutelarik Europa mundu mailan berrikuntzaren erreferentzia bihurtzea eta enpresei laguntzea teknologia berriak bizkorrago eta modu eraginkorragoan barnera ditzaten.

Ekimen horrek berrikuntza-sare espezifiko bat izango du Euskadin, Europako hego-mendebaldeko ekoizpen aurreratuko proiektuak, prestakuntza eta ekoizpen-jardueraren dinamizazioa sustatzeko eta finantzatzeko. Aernnova, Mondragon Korporazioa, IK4 Research Alliance, ITP Aero eta Tecnalia arduratuko dira ekimena martxan jartzeaz, eta, aurreikuspenen arabera, 2019an hasiko da. Urtean 15 milioi euro baino gehiagoko aurrekontua izango du sare horrek, enpresei laguntzeko bai produktu berriak sortzen eta garatzen, bai lehendik dauden teknologiak aplikatzen, eta Euskadiko industria-enpresen erdiek baino gehiagok horretaz baliatzeko aukera izango dutela aurreikusten da.

Aliantzaren helburuak

Euskadiko sareak honako erronka hauei heldu nahi die: industriaren digitalizazioa bultzatzea eta ekoizpen arinagoa, malguagoa eta ingurumenaren eta gizartearen ikuspegitik iraunkorragoa lortzen laguntzea. Honela, kalitatezko lanpostuak sortzen lagunduko du, baita ikasleak prestatzen, talentudun pertsonak erakartzen eta enpresek, zentro teknologikoek, unibertsitateek eta inbertitzaileek parte hartzen duten “berrikuntza-ekosistemak” sortzen ere.

Horretarako, euskal sareak eragileen arteko harremanak sustatzeko mekanismo berriak jarriko ditu martxan EIT Manufacturingen lehen 7 urteetan, 100 produktu berritzaile baino gehiagoren merkaturatzea bultzatzeko, 200 enpresa berri baino gehiago sortzeko eta 10.000 pertsonatik gora trebatzeko.

EIT Manufacturing 50etik gora erankundek zazpi urtetan zehar egindako lanaren emaitza da, eta euskal partzuergoaren berariazko ekarpena erabakigarria izan da ekimenak arrakasta izan dezan. Sareak bultzatzaile eta babesle du Berrikuntzaren eta Teknologiaren Europako Institutua (EIT), zeinak sustatzen baitu prestakuntza ematen duten, I+G+Ba egiten duten eta negozio berriak sortzen dituzten berrikuntza-sareak sortzea. EITk dagoeneko sortu ditu honen antzeko komunitateak beste sektore batzuetarako, hala nola energia, ingurumena, sektore digitala, lehengaiak, elikadura eta hiri-mugikortasuna.