Proiektuaren lehen erdia betetzear dela, CAESAR Proiektu Europarraren ikerketa-taldeak lanean jarraitzen du eskala industrialean burdinazko txatarren kalitatea hobetzeko, ondoren ibilbide elektriko (EAF, Electric Arc Furnace) eta integral (BF-BOF, Blast Furnace – Basic Oxygen Furnace) bidez altzairuen fabrikazioan aplikatzeko.
Orain arte, lantaldeak hainbat teknologia aztertu ditu, bai banaka bai elkarren artean konbinatuta, ataldutako eta eraispen jatorriko txatarrak (HMS, Heavy melting steel, ingelesezko sigletan) eta tresna elektriko eta elektronikoen hondakinetatik (TEEH) datozen txatar zatikatuak eta burdinazkoak egokitzeko, bai eta Fe edukian aberatsak diren hondakin korronteak sortzeko ere, morfologia hobetuta, esterilen edukia murriztuta eta beste elementu metaliko batzuk bereizita. Partzuergoak ArcelorMittal Dunkerqueren instalazioetan egin berri duen jarraipen-bilerak aukera eman zien CAESAReko bazkideei lagin garbien karakterizazioaren emaitzak partekatzeko, garbiketa-prozesuarekin lortutako eraginkortasuna ebaluatzeko eta hurrengo ekintzak zehazteko.
Topaketan, halaber, hainbat sentsorerekin egindako probetan lortutako emaitzak aztertu ziren, txatarrak sailkatzeko erakusten duten bideragarritasuna ebaluatzeko, hauek izan ditzaketen elementu edo ezaugarri kaltegarrien arabera. Ildo horretan, txatarra mota bakoitzerako sentsorizazio-teknologia egokienak eta hondakin horien optimizazio-prozesuetan garbiketa-baldintzak integratzeko bideak ere eztabaidatu ziren. Horrekin batera, sailkatzeko eta garbitzeko teknologien eskalatzearekin lotutako alderdiak landu ziren.
Aipatutako ikerketa-lerroez gain, partzuergoa lanean ari da burdinazkoak ez diren zatiki bereizien balioa handitzeko, txatarren garbiketa- eta sailkapen-prozesuetan. Arlo horretan, proiektuaren baitako hainbat ikerketa-taldek burdinazkoak ez diren metalak eta berreskuratutako material ez-metalikoak ezaugarritzen lan egiten dute, eta bigarren mailako lehengai bakoitzaren aplikagarritasuna ikertzen dihardute. AZTERLANen kasuan, Metalurgia Ikerketa Zentroa INATECekin batera ari da lanean kobrez eta aluminioz aberatsak diren eta espezifikazioak betetzen dituzten frakzioak lortzeko, galdaketan perlitizatzaile eta altzairuan desoxidatzaile gisa baloriza daitezkeenak, hurrenez hurren.
Konposizio kimiko espezifikoa lortzera bideratutako sailkapen- eta garbiketa-teknikez gain, proiektuan alderdi garrantzitsuak garatzen ari dira txatar-parkearen kudeaketarekin eta bihurgailuan kargatzeko errezetaren definizioarekin lotuta. Horien artean daude txatarraren bolumena eta dentsitatea kalkulatzeko metodoak, 3D eskaneatzean oinarrituak (kamioietan, sarreran eta saskiak kargatzean). Gainera, txatarra karakterizatzeko software-soluzioak garatzen ari dira. Eremu horri dagokionez, bileran ArcelorMittal Gent enpresaren BOFeko metalaren konposizioaren modelatuaren emaitzak aurkeztu ziren, estatistika-ikaskuntzaren bidez lortutakoak.
Aipatutako jardueretan aurrera egiten den bitartean, CAESARren parte hartzen duten siderurgia-lantegiak (ArcelorMittal Sestao, ArcelorMittal Gent, ArcelorMittal Dunkerque) metal likidoaren kalitatea ebaluatzen ari dira labeen kargan prozesatu gabeko txatar-mota desberdinak erabiltzen dituztenean, portzentaje desberdinetan. Txatar garbiak erabiliz egingo diren hurrengo balidazio-probak txatarren kalitate-baldintza espezifikoak identifikatuz egingo dira.
Ezkerra. David García eta Clara Delgado AZTERLANeko ikertzaileak CAESAR proiektuaren 4. bileran partzuergoko kide diren gainerako erakundeetako ordezkariekin. Eskuina. ArcelorMittal Dunkerqueko siderurgia-lantegira egindako bisita.
ArcelorMittal Dunkerqueko siderurgia-lantegira bisita
Jarraipen-bilera ArcelorMittal Dunkerqueren instalazioetan egiten zela aprobetxatuz, partzuergoko ordezkariek koke-bateriak, sinterizazio-planta, labe garaiak, bihurgailuak eta beroan ijezteko trena bisitatzeko aukera izan zuten. Bisitaren zatirik handiena txatarra parkean eta haren kontrol digitalizatuko zentroan egin zen. CAESAR proiektuko bazkideak txatarra kudeatzeko eta saskiak kargatzeko eragiketen lekuko izan ziren, eta proiektuan egindako proba batzuetan erabilitako txatarra garbitzeko makina ikusi ahal izan zuten.
CAESAR proiektuaren kideek AZTERLANen egingo dute hurrengo bilera aurtengo urrian. Ordurako aurreikusita dago BOF eta EAF bakoitzean baliozkotu beharreko txatar-kalitateen lehen mailako tratamendu-ibilbide aurreratuak zehaztuta izatea.
Proiektuaren partzuergoan honako hauek hartzen dute parte: Centre de Recherches Métallurgiques (proiektuaren koordinatzailea), ArcelorMittal Basque Country Research Centre, ArcelorMittal Maizières Research, Rolanfer Recyclage, Reydesa Recycling, INATEC, SICON GmbH, ArcelorMittal Belgium, AZTERLAN Metallurgy Research Centre, Katholieke Universiteit Leuven, ArcelorMittal Sestao eta ArcelorMittal Frantzia. Europar Batasunak finantzatzen du proiektua, 101058520 dirulaguntzarekin.
