AZTERLAN Zentro Teknologikoa FIHI FORGING INDUSTRY, S.L, GRI Renewable Industries enpresekin eta TECNALIArekin lanean ari da brida erresistenteagoak eta diseinu optimizatuagodunak garatzeko, offshore aerosorgailu handiak eta potentzia-ahalmen handiagokoak instalatzeko.
Zalantzarik gabe, energia eolikoak lehentasuna izango du 2050eko CO2 isurketa-neutroko Europaren energia-mixean. Mundu mailan, aurreikuspenen arabera, industria eolikoak 17.000 GWh sortuko ditu 2050ean (2018an baino 15 aldiz ahalmen handiagoa, 1.100 GWh), eta 5 TW arteko elektrizitatea sortzeko ahalmena izango du. Espazio mugarik ez dagoenez eta energia sendoagoa sortzen denez, offshore parke eolikoak energia-sektorearen apustu sendoa izango dira datozen urteetan, potentzia handitzeko joera nabarmenarekin.
Asmo handiko hazkunde-helburuekin, parke eolikoak azkar martxan jartzea, energia sortzeko gaitasuna handitzea eta haize-sorgailuen errendimendua optimizatzea dira sektoreak aurre egin behar dien funtsezko alderdiak. Hala, tamaina eta potentzia handiagoko egiturak sortzea da joera, eta, aldi berean, ekoizpen-katearen eta instalazio-prozesuaren optimizazioa, osagaiz osagai. Testuinguru horretan, brida eolikoak egiturazko elementu kritikoak dira, bereziki offshore eolikoaren eremuan.
Itsasoko haize-sorgailu eolikoentzako brida-belaunaldi berri bat garatzeko asmoz, FIHI FORGING INDUSTRY, S.L. aerosorgailuentzako osagaiak fabrikatzen dituen enpresak NEXTFLANGE proiektua gidatzen du, GRI Renewable Industries enpresaren, AZTERLAN Metalurgia Ikerketa Zentroaren eta TECNALIAren (biak BRTAko kideak) eskutik. Proiektu honen helburua da brida disruptiboak diseinatzeko altzairu eta fabrikazio-ibilbide berriak garatzea, produktuaren egiturazko eraginkortasunari dagokionez bikaintasuna lortzeko.
Itziar Berriozabalgoitia AZTERLANeko ikertzailearen hitzetan, Konformazio Teknologietan aditua, “bridak fabrikatzeko erabiltzen diren egungo materialek ez dute dorreen potentzian ematen ari den eskala aldaketak eskatzen duen erresistentzia mekanikoa. Potentzia handitze horren ondorioz, bridek jasan behar dituzten eskaerak gero eta handiagoak dira, eta, horregatik, altzairu berriak garatu behar dira, betiere bridek bete behar dituzten arauen mugen baitan (UNE EN 10025), jarduera egokia ziurtatzeko”. Hori dela eta, materialen esparruan “sektorean erabiltzen den S355NL altzairutik abiatuko gara, konposizio kimikoaren mailan bilakaerak garatuta, erresistentzia eta irmotasuna hobetzeko”.
Hala ere, proiektuko taldeak badaki “materialen alorrean bakarik ekinda ezin zaiela aurre egin aplikazio horrek eskatzen dituen eskakizunei”. Horregatik, “tratamendu termikoko eta soldadurako ibilbide berriak garatzeko ere lan egin beharko dugu, batez ere altzairu horien soldagarritasun eta portaera termikoko desberdintasunak direla eta, sektorearen eskaera handiak betetzeko”.
Torlojututako lotura-sistemen mugak gainditzeko sortutako briden diseinu berria
Fabrikazio-materialen ezaugarriei buruz lan egiteaz gain, NEXTFLANGE FIHI proiektuaren baitan lotura falkadunaren diseinuaren kontzeptu berrien egingarritasuna ere ebaluatuko du, sektoreko ohiko kontzeptuekin alderatuta (torlojututako loturak). “Torlojututako L formako egungo brida sistemak ez du jasaten tamaina eta potentzia handitzeak eskatzen dituen turbina-pisuen gehikuntza”. Garatuko den lotura-sistema berriak muga hori gainditzea ahalbidetuko du, lotura sendoagoak lortzen lagunduz; kasu honetan, “erronka nagusia fabrikazio aurreratuko ibilbide bat garatzea izango da, diseinu disruptibo horretarako, eta, gainera, sektoreari kostu lehiakor batean eskaintzea ahalbidetuko du”.
NEXTFLANGE proiektua 2022an hasi zen eta 2025eko lehen hiruhilekoan amaitzea aurreikusten da. NEXTFLANGE proiektua (CPP2021-008783) MCIN/AEI/10.13039/501100011033 eta NextGenerationEU/PRTR Europar Batasunak finantzatzen dute.
