AZTERLANek galdatutako osagarrien kontrol metalurgikorako garapenei buruzko jardunaldi teknikoa antolatu du

Jardunaldiak egoera likidoan dagoen metala kontrolatzeko eta hobetzeko gakoak landuko ditu kalitate metalurgikoarekin eta solidotze prozesuarekin lotutako akatsak ekiditeko.

Egoera likidoan dagoen metalaren eta honen solidotze prozesuan ekiteak galdatutako osagarrien kalitatean zuzenean eragiteko aukera eskaintzen du metalaren ezaugarriekin lotutako akatsak aurreikusteko eta ekiditeko eta bezeroek behar dituzten ezaugarri mekanikoak bermatzeko.

Analisi termikoak arazo metalurgikoak konpontzeko eskaintzen dituen aukerak lantzeko eta teknologia hauek erabilita produkzio prozesuen hobekuntza esperientziak partekatzeko helburuarekin, AZTERLAN Metalurgia Ikerketa Zentroak eta VEIGALAN ESTUDIO 2010 enpresak “Berrikuntza teknologikoak galdatutako osagarrien fabrikaziorako kontrol metalurgikoaren alorrean” jardunaldi teknikoa antolatu dute. Doako ekitaldi hau abenduaren 11n egingo da AZTERLANen egoitzan.

Lan saio honetan, metalurgian, galdaketa prozesuetan eta 4.0 teknologietan adituak diren bi erakundeetako ordezkariek, SAKTHI PORTUGALen laguntzarekin, osagarrien fabrikazioan aplikatzeko kontrol metalurgikoko teknologien erabilera kasuak aurkeztuko dituzte. Horrez gain, alor honetan berriki garatutako berrikuntzak ezagutzera emango dira.

Gorka Zarrabeitia AZTERLANeko Burdinazko Materialen ikerketa lerroko ikerlari seniorraren hitzetan “aurrerakuntza handiak egin dira alor honetan, izan ere, Galdak kalitate indizeak hobetzeko eta fabrikatutako osagarrien ezaugarri mekanikoak bermatzeko beharra dauka”.

Jardunaldi teknikoa galdako produkzio, ingeniaritza eta kalitate alorreko teknikariei eta arduradunei zuzenduta dago. Ekitaldiko plazak mugatuak dira. Ondorioz, beharrezkoa da aurrez izena ematea. Informazio guztia eta programa esteka honetan aurki daitezke.