AZTERLANek AAPICO PORTUGALen mekanizatu planta berriaren garapenean parte hartu du

Material metalikoetan eta hauen eraldatze teknologietan berezituta dagoen zentro teknologikoak AAPICO PORTUGALEN (lehengo SAKTHI PORTUGAL) SP21 galdaketa nodularreko plantaren sorkuntzan ere parte hartu zuen, zeinak automobilgintzarako galda-burdinazko osagarrien fabrikazioan diharduen.

AZTERLAN Metalurgia Ikerketako Zentroak AAPICO PORTUGAL (SAKTHI PORTUGAL) enpresaren mekanizazio planta berriaren kontzepzioan, garapenean eta martxan jartzean parte hartu du. Lantegi berria Trofan (Portugal) kokatuta dago eta AAPICO MACHINING izena du. 9.000 m2ko gainazal erabilgarria du eta, egun, guztiz automatizatutako 4 zelula dauzka martxan.

Urteko 3M pieza sortzeko gaitasun produktiboarekin, fabrika berria AAPICO PORTUGALek fabrikatutako galda osagarriak mekanizatzera zuzenduta dago. Honela, nazioartean ezaguna den galda enpresak mekanizatua integratu du bere prozesuaren baitan. “Egundaino, mekanizazioa kanpoan landutako prozesua zen SAKTHIrentzako, izan ere, ez zegoen bere gaitasunen baitan. Hala ere, bezeroen aldetik jasotako kalitate eskakizun gero eta altuagoek norabide honetan joatera behartu dute” dio Paco Vega AZTERLANeko mekanizatu zelulen ezarpen adituak.

Honela, 3 urtetan, AZTERLANen laguntzarekin, AAPICO gai izan da “ez soilik bere mekanizatu linea muntatzeko eta martxan jartzeko, baizik eta, gainera, automobilgintza sektoreko bere bezeroen homologazioa lortu du”. Anbizio handiko proiektua izan da, bai ezarritako epeengatik bai alderdi teknologikoagatik.

Trofako esperientzia era honetako bigarrena da AZTERLANen eta enpresa portugaldarraren artean, izan ere, AZTERLANek SP21 fundizio nodularreko plantaren sorkuntzan parte hartu zuen (Aguedan, Portugal, kokatua). “Lehenengo esperientzia honek ahalbidetu zigun Etorkizuneko Galdaren gure bisioa hezurmamitzea, hau da, zero akats produkziora bideratutako prozesu konektatu efizientedun fundizioa sortzea. Bertan, hasieratik integratu genituen AZTERLANek sortutako erreminta aurreratuak bai kalitate metalurgikoaren kontrolerako (Thermolan® sistema) bai produkzio prozesuaren kontrolerako (Olimpo sistema)”.

Bere aldetik, Trofako mekanizatu planta berriaren garapena egiteko, ezarpen progresiboko estrategia definitu zen mekanizazio zelula desberdinentzako, beti ere, AAPICOrekin batera sortutako ezagutza berriaren ezarpenarekin lerrokatuta. Horregatik, aurre-mekanizatu prozesua izan zen barneratzen lehena. “Nahiz eta hasiera batean prozesuak piezaren azken mekanizatua barneratzea aurreikusten zuen (bezeroak berari dagozkion azken mekanizazio lanak burutzeke), bidean lortutako arrakastek erronka berri bat jarri zuten mahai gainean: osagarrien mekanizazio osoa burutzea, hau da, osagarriak bezeroari muntatzeko prest hornitzea. Azken helburu hau duela gutxi lortu dugu”.

Honela, AZTERLANek proiektuaren etapa guztietan parte hartu du, baita mekanizatu zikloaren balioztatzean edota makineriaren doikuntzan ere. “Galda materialetan eta hauen transformazio teknologietan dugun esperientziak maila honetako disziplina anitzeko proiektua lantzea ahalbidetu digu; aldi berean, balio handiko ezagutza barneratu dugu”.

Mekanizatu zelula AAPICO MACHINING enpresaren lantegian.